२० माघ २०७९, शुक्रबार February 3, 2023

कर्मशिल सहकारीके ११ औं साधारण सभा निप्टल

२८ पुष २०७९, बिहीबार
कर्मशिल सहकारीके ११ औं साधारण सभा निप्टल

सागर कुस्मी
धनगढी । कर्मशिल बचत तथा ऋण सहकारी संस्था लिमिटेडके वार्षिक साधारण सभा हुइल बा । धनगढीमे बुढके रोज सहकारीके भवन निर्माण स्थलमे ११ औं साधारण सभा हुइल ।

कार्यक्रममे बर्का पहुना धनगढी उपमहामगरपालिका वडा ८ के वडा अध्यक्ष जुगराम चौधरी रहिंट । छोट समयमे फेन ढेर प्रगती हुइल डेख उहाँ कहलैं, कर्मशिल सहकारी आब अपन गोरामे ठर्हियाके नेंगटी रहल बटैलैं । शेर सदस्य ओइने बचत कैके लर्कापर्कनके ओ अपन परिवारजे भविस्य सुनिश्चित हुइल बा ।

उहाँ कहलैं, सहकारीमे बचत कैलेसे जेष्ठ नागरिक ओइनके बुढेसकालके साहारा, गृहिणी महिला लोगनके दैनिक जीवनमे घर व्यवहार चलैना फेन सहिल हुइल बटैलैं । ओस्टेके थारु समुदायके बर्का टिहुवार माघक् सुभकामना फेन डेलैं ।

११ औं साधारण सभामे विशिष्ट पहुना सहकारीके संस्थापक अध्यक्ष राममणि चौधरी रहिंट । ३५ जहन से समुहहे सुरुवात करल इ कर्मशिल सहकारी आझ १० बरस पूरा कैके ११ बरसमे गोरा टेक्के आघे बर्हटी रहल बटैलैं । उहाँ कहलैं, पहिले भाडामे कार्यालय संचालन हुइटी आइल रहे । आब अपन जग्गा किनके घर फेन बनैटी रहल बा । इ कलक सहकारीके प्रगतिशिल हुइल उहाँ बटैलैं ।

सहकारीके कोषाध्यक्ष दया शंकर चौधरी २०७८÷०७९ के आर्थिक प्रगती प्रतिवेदन सुनैले रहिंट । उहाँ कोरोनाके महामारीके कारण शेर सदस्य ओइन ऋण उपलब्ध कराइ नैसेकल बटैलैं । अगामी दिनमे आब ऋण डेना व्यवस्था फेन हलि हुइना बटैलैं ।

जे मजा काम करठ ओकर पक्का फेन इ समाजमे मुल्यांकन हुइठ । अस्टेके इ सहकारीमे मजा काम कैलकमे नियमित बचत कर्तामे अन्तराम चौधरी ओ बिमला चौधरीहे सम्मान कैगैल बा ।

अस्टेके असल ऋणीमे दिपेन्द्र चौधरी ओ सुनिता डंगौरा सम्मानित हुइल बटैं कलेसे सबसे जेष्ठ सदस्य फलिराम डंगौरा ओ बाल बचत कर्तामे रोशिका चौधरी फेन सम्मानित हुइल बटैं ।

कार्यक्रममे सहकारीके शेर सदस्य सीताराम चौधरी, सरु चौधरी, रामसिंह चौधरी, जीत बहादुर चौधरी लगायत अपन अपन मन्तव्य डेले रहिंट । सक्कुहुनके अक्के आवाज रहिन कि आब सहकारीहे सब जाने मिल्के आघे बर्हाइ । लावा शेर लेहल सदस्य लोगनहे शेर प्रमाणपत्र फेन वितरण कैगैल बा ।

सहकारीके अध्यक्ष रामप्रसाद चौधरी के अध्यक्षतामे हुइल रहे । उहाँ कहलैं, आब इ सहकारीहे आघे बर्हाइक लाग सक्कु जाने सहकार्यके जरुरत रहल बटैलैं । उहाँ कहलैं, सक्कु शेर सदस्य ओइने कम्तिमे फें मासिक ५०० बचत कैडेलेसे सहकारीहे आघे बरहैनामे ढेर मद्दत पुग्ना बटैलैं ।

अस्टेके कार्यक्रम संचालन सचिव धर्मराज चौधरी कैले रहिंट । स्वागत मन्तव्य केशव चौधरी डेले रहिंट । उहाँ इ सहकारी ११ बरसके आझ असिक कार्यक्रम करे पैलकमे खुशी व्यक्त कर्लैं । कार्यक्रममे शेर सदस्य, संस्थाके कर्मचारी, बुद्धिजीवीनके सैगर उपस्थिति हुइल रहे ।

कार्यक्रममे थारु लोक गायक राजु चौधरी राजके थारु लोग गीत ढमार फेन सुनैले रहिंट कलेसे गजलकार संगत कैलरिया फेंन गजल सुनाके सहभागी हुइल दर्शक लोगन चौकस कैले रहिंट ।

२०६८ सालसे संचालन हुइटी आइल कर्मशिल सहकारी बचत तथा ऋण सहकारी संस्था लिमिटेडके अब्बेसम ६७८ जाने शेर सदस्य हुइल बटैं । इ सहकारीके अब्बे धनगढी ८ मे रहल कान्तिपुर टोलमे सहकारीके अपने भवन निर्माण हुइटी रहल बा ।