२० माघ २०७९, शुक्रबार February 3, 2023

जिउज्यानके जोखिममे शिवरत्नपुरबासी

२१ पुष २०७९, बिहीबार
जिउज्यानके जोखिममे शिवरत्नपुरबासी

सागर कुस्मी
हसुलिया । ’छे छे महिना होगैलस अभिनसम हमार बैठना कौनो ठेकान नैहो,’ हिरा देवी चौधरी अपन दुखपिर सुनैली, ’हमरे १६ घरपरिवार जिउज्यान बचैना जोखिमसे जुझ्टी रहल बटि । अपन जिउ बचैना होकि पशुचौपायनके । बर्खामे लडियाके डर । जारमे शीतपालाके डर । कहाँ जाप टे हमरे आरामसे सुटे पाब ।’

डख्खिनओर भारतके दुधुवा नेशनल पार्क । उत्तर, पस्छिउँ ओ पुरुब बारोमास बहना मोहना लडियाके बहाब । इ दृश्य हो कैलालीक् कैलारी गाउँपालिका वडा नम्बर ३ शिवरत्नपुर गाउँक् ।

’जबसे बार्ह घर डुवार सारा बस्ती पुहाके लैगैल टबसे हम्रे पुरे गाउँक मनैनके बिचल्ली बा’ हिरा देवी कलिन, ’ना टे सुट्लेसे निन परठ ना टे मनमे चयन हो ।’ गैल असार महिनामे आइल आर्हसे शिवरत्नपुर बासीनके पूरा गाउँ मोहना लडिया कटान करल टबसे मोहनक ढिकुवामे किर्पाल टानके बैठल बटैं ।

हिरा कलि, ’बस्तीमे ना पानी पिना एक्ठो कुल बम्मा नैहो । मनैनके लाग पानी पिना फें सुगम नैहो । पशुजानबरिनके टे बाटे नाकरी ।’ २०७९ असार महिनामे आइल बार्ह पहिल झट्कामे लगाइल तटबन्धन पूरा पुहाके लैगैल बा ।

कैलाली जिल्ला कैलारी गाउँपालिका अन्तर्गत वडा नम्बर ३ के शिवरत्नपुर, मोहनपुर ओ हौसलपुर कैके ३०० घर धुरी हरेक साल बर्खाके समयमे लडियाके कटानसे उच्च जोखिमके समस्यासे गुजरटी आइल बा । मने शिवरत्नपुर गैल बर्खा ठनसे जेडा समस्या भोग्टी आइल बा ।

अब्बे सबसे जेडा समस्या शिवरत्नपुर गाउँक छुट्की पुरुवाके बा । जहाँ १६ घरपरिवारके उठिबास हुइल बा । ओइने अब्बे मोहनाके ढिकुवामे अस्थाइ टहरा बनाके जिटि बटैं । स्थानीय निकाय कुछ व्यवस्था करि कि कना आसमे इ बस्ती अपन सुरक्षाके लाग बर्का बनुवाँमे फेन अपन झोंपरी बनैले बटैं ।

शिवरत्नपुर अब्बे विस्थापित होके बैजपुर ओ बसन्ता गाउँक बिच्चेमे रहल खाली ठाउँमे किर्पाल टानके शीतघामसे जिनगी बटैटी रहल बा । जहाँ पिना पानी टलक नैहो । ’हमरे अब्बे अइसिन समस्यामे बटि कि ना पानी पिना नल्का हो ना केक्रो घरम् बत्ती हो’, स्थानीय दिल बहादुर चौधरी कनैं, पानी पियक लाग फेन औरे गाउँ अउरेक नल्कामे जैठी । कोइकोइ टे पानी फेंन नैडेठैं ।

इ समाचार तयार पारटसम गाउँंपालिका अध्यक्ष चौधरी कहलैं कि, इ टुरन्टारे हुइना काम नैहो । हमरे सम्बन्धित सरोकार ओलानसे छलफल कैके कामके प्रक्रिया आघे बर्हा सेकल बटि । जहाँसम इ समस्या समाधान हलि पूरा हुइ ।

कैलारी गाउँपालिका अध्यक्ष राज समझ चौधरी कहलैं, शिवरत्नपुर गाउँ जेडा जोखिममे जिएटा, अब्बे उ गाउँबासीनके ढेर समस्या फेन बटिन । इ गाउँक समस्या समाधानके लाग पालिकासे आघे बर्हाइल जानकारी डेलैं ।

सिमाबासी गाउँ शिवरत्नपुरमे स्वास्थ्य, उच्च शिक्षा, यातायात, खानेपानी लगायत ढेर समस्या रहल बा ।
बर्खामे विद्यार्थीनहे स्कुल अइना जैना, सुत्केरी महिला ओइनहे फेन बहुत समस्या भोग्टी आइल बटैं ।

शिवरत्नपुर गाउँ किल नाही कैलारी गाउँपालिका ३ मोहनपुर ओ ७ मे पर्ना हौसलपुर फेन लडियाके कटानसे पिडित बा । हरेक गाउँबासी अपन गाउँ बस्तीके लाग स्वयम् ओहे गाउँबासी सचेत हुइलेसे अइसिन समस्यासे मुक्टी पाइसेक्जाइठ । समयमे सचेत ओ जागरुक होके सम्बन्धित निकायसे पहल करे परठ ।