२३ मंसिर २०७९, शुक्रबार December 9, 2022

पहुरा थारु दैनिक ‘क’ वर्गमे पर्ना सफल

१७ माघ २०७८, सोमबार
पहुरा थारु दैनिक ‘क’ वर्गमे पर्ना सफल

धनगढी । कैलालीके धनगढीसे प्रकाशित हुइटी रहल पहुरा थारु दैनिक प्रेस काउन्सिल नेपालके ‘क’ मे पर्ना सफल हुइल बा ।
काउन्सिलसे आर्थिक वर्ष २०७५/०७६ ओ २०७६/०७७ के पत्रपत्रिका वर्गीकरणके नतिजा सार्वजनिक करेबेर डुनु बरसके नतिजामे स्थानीय ‘क’ वर्गमे पर्ना सफल हुइल हो । यिहीसे आघे यी दैनिक आर्थिक वर्ष २०६७/०६८ सालसे निरन्तरण ‘क’ वर्गमे परटी आइल बा । पहुरा दैनिक दुई वर्ष आघेसे पहुरा डटकम अनलाइन पोर्टल फेन चलैटि आइल बा ।
वि.सं २०६० सालसे पहुरा थारु साप्ताहिकके रुपमे प्रकाशन सुरु करके २०६६ चैत ३१ गतेसे दैनिक प्रकाशनके यात्रा सुरुवाट करल रहे । प्रेस काउन्सिल नेपाल यि दैनिकहे थारु भाषा ओ पत्रकारितामे विशेष योगदान करल बाफत २०६७ सालमे ‘भाषागत पत्रकारिता पुरस्कार’से सम्मानित करल रहे ।
ओस्टेक आ. व.२०७६/०७७ सालके कैलालीसे प्रकाशित पाँच ठो दैनिक पत्रिका क वर्गमे परल बा । ओस्टेक कैलालीसे प्रकाशित हुइटी रहल सुदूर चिनारी द्वैमासिक पत्रिकाफे क बर्गमे परल बा । ओस्टेक दैनिक, सप्ताहित ओ साहित्यिक कैके १६ पत्रिका ख बर्गमे बा । ग बर्गमे पाँच ठो पत्रिका परल बा ।
प्रेस काउन्सिल नेपालसे प्रेस काउन्सिल ऐन, २०४८ के दफा १० बमोजिम गठित पत्रपत्रिका वितरण सम्परीक्षण समितिके वर्गीकरण प्रतिवेदनके आधारमे आ.व. २०७५/०७६ ओ २०७६/०७७ के वर्गीकरणके नतिजा सार्वजनिक करल हो ।
आ.व. २०७५/०७६ के वर्गीकरणके लाग आवेदन डेहल ८८३ (प्रदेशस्तर १६६, राष्ट्रियस्तर १६५, स्थानीयस्तर ५५२) पत्रपत्रिकामन्से क वर्ग–२१९, ख वर्ग–४७६, ग वर्ग–१३७, घ वर्ग–१५ रहल बावै । नियमित मने हुबहु ओ वर्ग कायम नइहुइल ३६ पत्रिका रहल बा ।

ओस्टेक आ.व. २०७६/०७७ के वर्गीकरणके लाग आवेदन डेहल ८७८ (प्रदेशस्तर १६९, राष्ट्रियस्तर १४९, स्थानीयस्तर ५६०) पत्रपत्रिकामन्से क वर्ग–२३९, ख वर्ग–४३१, ग वर्ग–१६३, नियमित मने हुबहु ओ वर्ग कायम नैहुइल ४५ पत्रिका रहल बा ।