धनगढी, ९ कुवाँर । डसैंमे विशेष महत्वके साथ नाचजैना थारुनके सखिया ओ झुम्रा नाच सुरु हुइल बा । सखिया ओ झुम्राके तालमे बज्ना मन्द्रासँगे बोलाजैना मञ्जिराके आवाजसे थारु गाउँमे अब्बे बेग्लै रौनक छाँइल बा ।
थारुनके घर आँगनमे अब्बे मन्द्रा ओ मञ्जिराके झानकारमे महिला सखिया नच्टी रमैटी रहल दृश्यसे गाउँमे बेग्लै रौनक डेखल बा । ढेर गाउँमे डसैँ लच्क्याइलसँगे सखिया ओ झुम्रा नाच सुरु होसेकल बा । अब्बे सखिया झुम्रा नाचसे गाउँघर चैनार हुइल बा ।
कैलारी गाउँपालिका वडा नम्बर १ के दिलीप चौधरी डसियामे नाचक लाग सिख्टी रहल सखिया नाचसे गाउँ चैनार हुइल बटैलै । थारु समुदायमे डसैँ अइनासे एक महिना आघेसे सखिया ओ झुम्रा नाच नच्ना करजाइठ् ।