धनगढी, १५ भदौ । कैलाली उद्योग वाणिज्य संघके लावा नेतृत्व चयनके अध्यक्ष पदके उम्मेदवार रूपेश स्वाँर आपन प्यानलसहित १८ बुँदे घोषणापत्र सार्वजनिक करले बटै ।
इहे भदौ २८ गते हुइ जैटी रहल संघके ५१औं साधारण सभा तथा चुनावी अधिवेशनके लाग अँट्वारके धनगढीमे विशेष कार्यक्रमके बिच उहाँ व्यवसाय ओ व्यवसायीके सुरक्षा : हमार प्रतिवद्धता सहितके प्रमुख एजेन्डा रख्टी घोषणापत्र सार्वजनिक करल हुइट ।
स्वाँर उद्योग–व्यापारके संरक्षण, लगानीके सुरक्षा ओ व्यवसायीके हकहितहे प्राथमिकता डेटी आपन नेतृत्व चयन हुइलेसे व्यवसायमैत्री वातावरण सिर्जना कैना प्रतिवद्धता व्यक्त करले बटै । उहाँ कहलै, “कैलाली उद्योग वाणिज्य संघ नेपालके ‘क’ वर्गके प्रतिष्ठित संस्था हो । यी संस्थाके नेतृत्व कैना गौरवके साथे चुनौती फेन हो । अब्बे उद्योग व्यवसाय गम्भीर संकट ओ चुनौतिसे गुज्रटी रहल बा । ओहेमारे हम्रे व्यवसाय, व्यवसायी ओ लगानीके सुरक्षाहे मूलमन्त्र बनाके आघे बह्रब ।”
उहाँके प्यानलसे वरिष्ठ उपाध्यक्षमे केशवराज जोशी उम्मेदवार बनल बटै । जोशी वर्तमान उपाध्यक्ष फेन हुइट । ओस्टके, उपाध्यक्ष (उद्योग) मे लक्ष्मणराज पन्त, एसोसियट उपाध्यक्षमे अनिलकुमार भुजनिया, वाणिज्य उपाध्यक्षमे राधिका चौधरी ओ वस्तुगत उपाध्यक्षमे सिद्धराज पनेरु उम्मेदवार रहल बटै ।
महासचिवमे सुरेश पाण्डेय, कोषाध्यक्षमा तिलक बोहरा ओ सचिवमे प्रकाशकुमार चन्द उम्मेदवार रहल बटै । सदस्यमे रुपेश खड्का, अम्बिका भण्डारी, मिलन कुँवर, प्रेमबहादुर धामी, भरतबहादुर थापा, नेत्रप्रसाद तिवारी, देवराज जोशी, तेज बम, शुभशंकर ठाकुर, दिपेश राठोर, अमर चोखाल, प्रमिला पाठक ओ मन्जु भट्ट उम्मेदवार रहल बटै ।
घोषणा कार्यक्रममे कैलाली उद्योग वाणिज्य संघके वर्तमान अध्यक्ष पुष्पराज कुँवर फेन सहभागी रहल रहिट ।
उहाँके घोषणापत्रके मुख्य बुँदामे व्यवसाय ओ व्यवसायीके कानुनी तथा प्रशासनिक समस्या समाधानके लाग विशेष पहल कैना, स्टार्ट–अप, नवप्रवर्तन ओ युवा उद्यमशीलताहे कोषमार्फत सहयोग, विपद् व्यवस्थापन कोषके स्थापना, अस्थायी कोरेन्टाइनहे स्थायी स्वरूपमे स्थापना कैना पहल, बैंक, वित्तीय संस्था, कर, भन्सार ओ बीमा क्षेत्रमे डेखल समस्याके समाधान कैना रहल बा ।
ओस्टके सीमापार अवैध व्यापार, चोरी निकासी तथा पैठारी नियन्त्रणके लाग कडाइ, नाकामे हेल्पडेस्क स्थापना कैके आयात–निर्यात सहज ओ पारदर्शी बनैना, कृषि, गैरकृषि तथा औद्योगिक उत्पादनके वैज्ञानिक बजारीकरणके लाग सरकारी तथा सरोकारवालासँग समन्वय, संघके सदस्यहुक्रनके अभिलेखीकरण, नवीकरण ओ सदस्यता प्रक्रियाके डिजिटलाइजेशन, धनगढी लगायत प्रमुख बजारमे रात्रीकालीन व्यवसाय सञ्चालन, धनगढीके पार्किङ समस्या समाधान ओ लगानी सम्मेलनके आयोजना, व्यवसायीके गुनासा संकलन तथा सम्बोधनके लाग अनलाइन–अफलाइन संयन्त्र विकास कैना रहल बा ।
ओस्टके औद्योगिक क्षेत्रके स्थापना, सहज विद्युत आपूर्ति, यातायात ओ पूर्वाधार विकासमा पहल, महोत्सवहे व्यवस्थित कैना, घोषणापत्रमे सुदूरपश्चिम महोत्सवहे व्यवस्थित, पारदर्शी ओ स्थानीय उत्पादन, कला–संस्कृति तथा नुकल प्रतिभाहे प्रोत्साहन कैना रहल बा ।