धनगढी, १८ साउन । अँट्वारी र तीज पर्वको अवसरमा के गाउँमा फुटबल प्रतियोगिता हुने भएको छ ।
कैलालीको कैलारी गाउँपालिका ४ के गाउँस्थि खेलमैदानमा २६ औं निसर्ग फुटबल पुरुष तथा महिला प्रतियोगिता २०८२ हुने भएको हो । न्यु युवा सुन्दर शक्ति क्लबको आयोजनामा थारु समुदायको मौलिक पर्व अँट्वारी र हिन्दु नारीहरुको महान पर्व तीजको अवसरमा प्रतियोगिता हुने भएको हो । प्रतियोगिता यहि भदौ १ गतेदेखि सुरु हुने भएको हो ।
आयोजक क्लबले शनिबार पत्रकार सम्मेलन गर्दै प्रतियोगिताबारे जानकारी गराएको छ । क्लब अध्यक्ष बृक्षलाल चौधरीका अनुसार भदौ १ गतेदेखि १२ गतेसम्म सञ्चालन हुने प्रतियोगितामा १६ वटा पुरुषको टिम र ८ वटा महिला टिमको सहभागिता रहने जनाएको छ ।
प्रतियोगिताको विजेतालाई पुरुषतर्फ नगद एक लाख प्रदान गरिने भएको छ, भने उपविजेतालाई ५० हजार प्रदान गरिने आयोजक क्लबले जनाएको छ ।
महिलातर्फको विजेतालाई २५ हजार र उपविजेता टीमलाई १५ हजार प्रदान गरिने क्लबका अध्यक्ष बृक्षलाल चौधरीले बताए ।
प्रतियोगितामा इन्ट्री शुल्क पुरुष टीमलाई ६ हजार पाँचसय र महिला टीमलाई दुई हजार पाँचसय कायम गरिएको छ ।
यसैबीच कैलारी गाउँपालिका ४ का वडाध्यक्ष ठागुराम चौधरीले खेलकुदमार्फत व्यक्तिले आफ्नो व्यक्तित्व विकास गर्न सकिने बताए । खेलकुदमार्फत आफूलाई चिनाउनुको साथै शरीरिक स्वास्थ्यको लागि खेलकुद महत्वपूर्ण रहेको उनको भनाइ छ ।
कार्यक्रममा जिल्ला फुटबल संघका सदस्य मनिराम चौधरी, कैलारी गाउँपालिकाका कार्यपालिका सदस्य लालबहादुर बिक, क्लबका खेलकुद संयोजक देवनारायण चौधरी, गाउँका भलमन्सा जगलाल चौधरीले खेलकुदसँगै समाज विकासको लागि युवाहरु अग्रसर भएर लाग्नुपर्नेमा जोड दिएका थिए । युवाहरुलाई कुलतबाट बचाउन पनि खेलकुदको महत्वपूर्ण भूमिका रहने समेत चर्चा गरेका उनीहरुले गाउँस्तरबाटै राष्ट्रिय र अन्तराष्ट्रिय स्तरको खेलाडी उत्पादन गर्न सकिने उल्लेख गरे ।