धनगढी, २१ चैत । नेपाल सरकारके पूर्व भूमि सुधार मन्त्री डा. गोपाल दहित आपन थारु लोक कला रीति संस्कृति बचैना जरुरी रहल बटैले बटै ।
दहित गोट्यार समाज कैलालीसे भजनीनगरपालिका वडा नम्बर ४ कुँरी गाउँमे हुइल डुसरा दहित गोट्यार जिल्ला सम्मेलनमे बोल्टी पूर्वमन्त्री डा. दहित थारु लोक कला रीति संस्कृति हेरैटी जाके थारुनके पहिचान समेत हेराइ लागल ओरसे उहीहे बचैना जरुरी रहल औंल्याइल हुइट ।
उहाँ विश्वभर हरेक समुदाय, जाति, वर्ग आपन पहिचान, लोक कला रीति संस्कृति भेषभूषा जोगैना ओ समाजहे संगठित कैना ओर लागल ओरसे थारु समुदाय फेन आपन पहिचानके लाग लोक कला, रीति संस्कृति बचैना आवश्यक रहल औंल्याइल हुइट ।

‘विश्वभरमे हरेक समुदाय, हरेक जाति, हरेक वर्ग हरेक क्षेत्र आपन पहिचान आपन संस्कृति जोगैनाके साथे आपन भेषभूषा जोगैना ओ आपन समाजहे संगठित बनैनाके साथे यदि समाज पच्छगुरल बा कलेसे आघे बह्रैना ओर लागल बटै,’ उहाँ आघे कहलै, ‘ओहेमारे हम्रे थारु समुदाय फेन सांस्कृतिक रुपमे, भाषिक रुपमे जातिय रुपमे, वर्गीय रुपमे अथवा गोलबद्ध पर्ना हरेक हिसावले आघे बह्रना आवश्यक रहल बा ।’
कार्यक्रममे बर्का पहुना समेत रहल डा. दहित दहितहुक्रे फेन आपन रीति संस्कृति बचाइक लाग संगठित हुइनाके आवश्यक रहल बटाइल रहिट ।

उहाँ कहलै, अब्बे सक्कु समुदायमे संगठित हुइटी रहल बटै, खाली थारुनमे दहिटनमे किल नाही थारुमे फेन कैयौठो थर बाटी रत्गैंया, उल्टहुवा, सत्गौंवा लगायतके सक्कु जाने आपन समाज गठन कर्टी बटै । ओहेमारे हम्रे दहितहुक्रे फेन संगगित हुइटी आपन रीति संस्कृति सहित टरटिहारमे पुजजैना टमान मेरिक पुजा, गुरुवा मन्त्र लगायत सक्कु चीज बचैना जरुरी रहल बा ।’
उहाँ इहीसे आघे औरे समुदाय गैरथारुहुक्रे आपन समाज गठन कैके भेषभूषा, कला संस्कृति रहनसहन, पोठीपत्र छपैना, संरक्षण कैनामे बहुट आघे पुगसेकल मने थारु आभिन फेन बहुट पच्छ्गुरल ओरसे हमार हमार भेषभूषा, कला संस्कृति रीति रिवाज लोप हुइना अवस्थामे पुगल ओरसे एकजुट हुइनाके विकल्प नैरहल बटाइल रहिट ।
आपन गोत्र पहिचानके साथे थारु कला रीति संस्कृतिहे संरक्षण सम्बद्र्धन तथा पुस्तान्तरणके लाग हुइल दहित गोट्यार सम्मेललनमे दहित समाजके केन्द्रिय उपाध्य तथा कार्यक्रमके खास पहुना भारती दहित, समाजके केन्द्रिय सदस्य जगतराम दहित, हिरा दहित दहित समाज कञ्चनपुरके अध्यक्ष विपिन दहित, भजनी नगरपालिका वडा नम्बर ४ के वडा अध्यक्ष जन्तराम दहित, गोदावरी नगरपालिका वडा नम्बर ५ के वडा सदस्य बसन्ती दहित लगायत मनतब्य राखल रहिट ।
कार्यक्रम दहित समाज कैलालीके अध्यक्ष दलबहादुर दहितके अध्यक्षामे हुइल रहे कलेसे कार्यक्रमके सञ्चालन सुधराम दहित करले रहिट । कैलाली जिल्लाभरके दहित गोट्यारनके सहभागितामे भब्य कार्यक्रम हुइल रहे ।