धनगढी, ७ चैत । अन्तर्राष्ट्रिय रक्तदाता सम्मान प्राप्त करल रक्तदाता अभियन्ता दीपक उपाध्यायहे सुन्दर सुदूरपश्चिम यातायात प्रालि सम्मान करले बा ।
भारतके उत्तर प्रदेश अन्तर्गत सोनभद्र (दुद्धी) मे आयोजित ‘वीर बिरसा मुंडा अन्तर्राष्ट्रिय रक्तदाता सम्मान २०२६’से सम्मानित उपाध्यायहे एक कार्यक्रम बिच सम्मान करल हो ।
सुदूरपश्चिम प्रदेशके रक्तदान सद्भावना दूत तथा प्रालिके प्रेस सल्लाहकार रहल उपाध्यायहे संस्थाके अध्यक्ष पदमराज सापकोटा लगायत पदाधिकारी तथा कर्मचारीहुक्रे प्रशंसा–पत्र, नगद ओ फूलमालासहित सम्मान कैटी बधाई डेले बटै ।
प्रालिसे जारी करल शुभकामना सन्देशमे उपाध्याय अन्तर्राष्ट्रिय स्तरमे हासिल करल सम्मानसे संस्थाके प्रतिष्ठा उच बनाइल उल्लेख करल बा । मानव सेवामे ओहकान निरन्तर समर्पण ओ रक्तदानप्रतिके योगदानहे प्रेरणादायी रहल कहटी संस्थासे आगामी दिनमे आउर सफल ओ सक्रिय भूमिका रहना विश्वास व्यक्त करल बा ।