६ चैत्र २०८०, मंगलवार March 19, 2024

जन्म दिन, पार्टी, शुभकामना

२१ श्रावण २०७८, बिहीबार
जन्म दिन, पार्टी, शुभकामना

बालिका चौधरी
हुइना ट मै आपन जन्मदिनक बारेम अपन ‘जीवनका वक्ररेखाहरू’ पोस्टाम लिख स्याकल बाटु । आजकाल फेसबुक मसे उइस (बधाइ) अइना हुइलक ओर्से महिहन याकर बारेम फेर से लिख्ना बाध्य बनाइटा । म्वार महन्ली दिदी कठि, धनकट्नी सिजनमे टैं जन्मल्या । मने कै साल, कौन बार, कटरा वजे कुछ पटा नि हो । डाइ बाबा रहल ब्याला उहाँहुकन फे पुछ्नु, उहाँहुकन फे पटा नि रहलम म्वार बर्थ डे कहिया मनैना ट ? ओहोर म्वार कब्बु ढ्यान नि गैल ।

म्वार बर्थ डे चर्चाम अइलक फे एकठो कहानी नुकल बा । म्वार सन्ह्ली दिदीक छाइहुक्र ज्वान हुइटी गैल । हुक्र अध्ययनक सिलसिलाम सदरमुकाम बैठ भिर्ल । आँजर–पाँजरक वातावरण बुझ लग्ल । डान्चे शहरी रमझम फे लाग लग्लीन् काहुँ । एक दिन छोट्की छाइ पुछल, मौसी ट्वार बड्डे कहिया हो ?
मै कनु, काजे चहल ट टुही ? ट कहल “सक्कु जे कत्रा मजासे बड्डे मनैठ, ट्वार बड्डे फे मनैबी’ कहल । मै ट अक्कना बक्क । म्वार जन्म कहिया हुइल कैक अपन डाइसे पुछ ना । मही का पटा ? नाना नानी रहल व्याला ट मै कैह्या जन्मनु पटा नि चलल । आब ट झन नानी नाना फे नि हुइट । मही कसिक ठाँहा रही ।
ट उ चलाखी करल । एक घची पाछ कहल कि ‘मौसी टै लाइसन बनाइल बाट्या ?”
“विना लाइसनके कसिक न्यगम ट’ कनु । लान्जे हेरी कहल । लाइसन खुशी साथ डेनु ट हुक्र टिन्यौजे हेर्ल म्वार लाइसन । बर्की व मन्ह्ली कल। म्वार फे लाइसन बनाइ परल ट कनु खुलल व्याला फारम भरो परिच्छा डेओ, आजाइ का समस्या हुइल ट ।
अस्ट बाटम महि भुलैल व म्वार लाइसनम रलक जन्ममिति टिपलेल । जब बैशाख ५ गते आइल, विहानक मै सुट्ल रनहुँ ट फोन आइल । यि लर्का काजे विहान्नी विहान्नी फोन कर्ठ का हुइलिन फे ? सोच्टी फोन उठैनु हेलो कह नि पैनु ट ह्यापी बड्डे मौसी कठ लर्का । मै ट टिनछक्क परगैनु । म्वार आज वड्डे हो कैक कसिक पटापैलो ? डाइसे पुछ्लो कनु ट नाही कल । कसिक आज म्वार बड्डे हुइल ट टिन्यौजे हाहाहा हँस्ल ओ कल मौसी ट्वार लाइसन जनाइल कि आज ट्वार बड्डे हो कैक । बैशाख ५ गते लिखल बाट्या जे ओहमार । मै मन र्मल कनु लेउ ट धन्यबाद बा । मजासे पार्टी मनैहो ।
सवारी लाइसनम रलक जन्म दिनके कहानी फरक बा फे । २०५८ साल अघन महिनाम जब मै डेनमार्क देशम जाक नाटक देखाइक लाग छनौटम पर्नु, टब म्वार नाउँम फे भिसा पठाइ पर्ना हुइल । वाकर लाग ट पासपोर्ट चाहा लागट, पासपोर्ट से पहिल नागरिकता चाहल । नागरिकता फे नि रह । उ व्याला हडबडम मै नागरिकता बनाइलाक प्रशासनम गैनु । चिन्हल मनैया रलक वर्से असिक बना हाली हुइ कैक सल्ला डेहल । मै वह अनुसार काम कर्नु । ओ नागरिकताके सिफारिस नगरपालिकामसे लेक प्रशासनम गैनु । जन्म मिति कैह्या हो ट पटा नि हो । ओह मार आपन अनुसार मिति, महिना ओ गते सम्झना सजल हुइ कैक बैशाख ५ गते अन्डाजी लिख्डेनु ।
नागरिकताम सनाखट करकलाक डाइ हन साइकलम बैठाक घरसे गुलरिया नगरपालिका क गेटम साइकलमसे उटार वेर साइकल उल्लार होगिल । आघक पैह्या उठगिल, पाछ क्यारेलम बैठल डाइ ट ओनाट छाती । अरि छाइ गिरैल्या कटि कटि डाइ ट भुइँयाम कुर्भुराइल । २४ इन्ची ढ्यांग डण्डीवाला साइकल बरका ठुल्ह डाइ, मै जुन खिन्टीमिन्टी ठाम्ह नि सेक्नु । नागरिकता सनाखट कर लैगिलक डाइ ट अस्पतालम । डाइन कुबरिक च्वाट लागल रहिन, उपचार कराक डु डिन पाछ म्वार सनाखट हुइल ट मै नागरिकता पैनु ओ पासपोर्टक लाग फे फारम भरैनु । टबसे हो म्वार जन्म मिति बैशाख ५ हुइलक ।
बर्थडे उइसके अनुभवः
पैल्ह पैल्ह जब बर्थडे उइसके लाग फोन, म्यासेज आए, टब मही बरा भावुक बनाए । काजे की इ दिन मही आपन डाइ बाबा ह सम्झाइट । जे महि फोन कैक शुभकामना डेहट एकघची ट म्वार बोली रुकजाए । का कहुँ कैक सोच्ठु । मनैनक बड्डे अइठन ट धुमधाम से सेलिव्रेट कर्ठ, पार्टी मनैठ, रमाइलो कर्ठ । असिक औरजहन से टुलना कर्ना हुइलक ओर्से मही भाबुक ओ गम्भिर बनाइठ । काजे की करिब चार दशक नाँघ गिल, आभिन सम जन्मदिन कसिक मनैठ कैक पटा फे नि हो ओ केक्रो बड्डे पार्टीम गैल फे नि हुँ ।
एक हिसावले बड्डे पार्टी मनैना महि बेकार लागठ् । ओहमार महि अभिन सम केक्रो बड्डे पार्टीम जैना मौका नि जुरल हो । कस्होक जुरगैल से फे जैना मन नि लागट । सायद उ मेरक संगट नि हुइलक ओर्से हुइ । उ मेर माहोल नि हुइलक ओर्से हुइ । उ रमझम म मै रमाइ नि सेक्टु, ओहमार कठ संगट अन्सारक फल । हुइना ट कत्रा मनैनक लाग बड्डे पार्टी स्पेशल हुइठुहिन । महिभर वेकार लागट ।
आजकाल बड्डे मनैना चलन फरक हुइ भिरल बा । आपन जरमदिनके अवसरम किउ खाना नि पैलक हुकन खाना खवाइठ, किउ अस्पतालम वेरम्हेन फलफुल बँट्ठ, किउ रक्तदान कर्ठ, किउ आश्रमम सहयोग कर्ठ । अस्हक हरेम मेरक सृजनात्मक काम कैल डेखजाइट । असिन चिज भर महि मन परठ । केक काट्क, डिया बुटाक का फाइदा । केक स्वस्थ्यके लाग हानिकारक फे हो ओ डिया बुटैना कलक जिन्गीक अजरार बुटाइल अस लागट महि ।
असौं २०७८ साल बैशाख ५ गतेके म्वार सवारी लाइसनक बड्डेम एक जे संघारी फेसबुकम बड्डे उइस कर्ल बाट कि अइना सालक बड्डेम रक्तदान कैक मनैबी कना कमेन्ट कर्ल । बाँचल रहम ओ निक–निक रहम ट जरुर मजा काम कैजाइ । फेसबुक म से बड्डे उइस पैलक फे असौ डु बरस हुइटा, वह फे मैगर संघारी सोम डेमनडौराक कारनले । वहाँ म्वार फोटु फेसबुकम डारक म्वार बारेम लिखक बधाइ डेल ट सक्कुजे पटा पैल ओ आपन आपन तरिकाले ‘विस’ कर्ल ।
असौक साल ट म्वार फोटु डारक सानु बाबु फे मही हाइलाइट बनैली, म्वार बड्डे विस करक । गैलक साल ट सक्कु जे लकडाउन म लक रलही । असौक साल बैशाख ५ गते दिनभर मोटरसाइकल यात्राम रनहुँ । बर्दियासे बाँके, बाँकेसे सुर्खेत । ढ्याउर संघरियनक फोन आइल रह । जब गन्तव्यम पुग्नु ट मिसकल म्यासेजके लम्मा लिस्ट आइल रह । ओ, इन्टरनेटके सुविधा हुइलक ओर्से फेसबुक नोटिफिकेशन एक सय से ढ्यार पुगल रह । यि मेरक सन्देश डेख्क एकघची भाबुक हुइनु ओ आपनह अप्नह ठम्न्हा कोसिस कर्नु । ज्याकर ज्याकर मिसकल रह, उहाँहुकन कलव्याक कर्नु । म्यासेज के रिप्लाई कर्नु ओ कमेन्ट क रेस्पोन्स कर्नु ।
इ लिख्नौटि लिखबेर सुनसान कोन्टीम अक्लह बाटु ओ स्वाचटु आब म्वार ठाँउम औरज रट ट कत्रा धुमधाम से जन्मदिन मनैने रलह, एकमेर के पर्व असक कैक मनैट । मिठ मिठ खैना बनैट । नाटपाट बलाक रमाइलो कर्ने रलह । असिन बाट फे म्वार मनम आइल ट एक मेरके खिन्नटा महसुस हुइल । फेरसे चित्त बुझैनु कि अत्रा साल होगिल, आभिनसम बड्डे नि मनैल हुइटु ट असौ काजे रमाइलो कर्नास लागटा ? असिक आपन मन ह डाइर्भट कर्नु । दिनभरिक डटकरल रलहु, चट्नी भाटबेरी खाक सुट्नु । बड्डे ना सड्डे ।
जय गुर्बाबा ।