हसुलियामे थरुहटके न्याय ओ अधिकारके लाग दासता विरुद्धके सम्मेलन, सक्कु पार्टीके केन्द्रीय नेतानसे सम्बोधन

-कैलारी अनलाइन

शनिवार, १५ फाल्गुण 7:12 AM

धनगढी, १५ फागुन । थरुहट थारुवान राष्ट्रिय मोर्चासे आदिवासी जनजाति थारु लगायतहुक्रनके हक अधिकारके सवालमे निरन्तर संघर्षरत रहल बा ।
इहीसे आघे थरुहट थारुवान संयुक्त संघर्ष समितिसे हुइटी आइल आन्दोलत तथा संघर्षके कार्यक्रम २०७२ साल भदौ ७ गते हुइल टीकापुर घटनापाछे ठिरमान हुइल रहे । मने चार बरसपाछे सामाजिक सद्भावके नारा डेके २०७६ भदौ ७ गतेके मितिमे टीकापुरमे भब्यताके साथ सम्मेलन करल रहे । उ सम्मेलनसे टमान माग मुद्धाहे दोहोर्‍याइटी आन्दोलन घोषणा करगैल रहे ।
संघर्षके पहिल चरणमे भदौ ७ गतेहे विद्रोह दिवसके रुपमे मनैना, टीकापुर घटनापाछे जेलसे रिहा हुइल लक्ष्मण चौधरीके संयोजकत्वमे गठन करल थरुहट थारुवान राष्ट्रिय मोर्चाहे प्रदेश, जिल्ला, क्षेत्र, नगर, गाउँ ओ वडासम विस्तार कैना उल्लेख करगैल रहे । उहे सम्मेलनसे लक्ष्मण थारुके संयेजकत्वमे १०१ सदस्यीय थरुहट थारुवान राष्ट्रिय मोर्चा फेन गठन करगैल । ओकर पाछे मोर्चासे जिल्लाभर टमान संघर्षके कार्यक्रम कैटी आइल बा । मोर्चा गठन हुइलपाछे फेनसे थारु आन्दोलन जुर्मुराइल पुगल बा ।
इहे बिच फागुन १५ ओ १६ गते कैलालीके हसुलियामे ‘शान्ति सद्भाव न्याय ओ अधिकारके लाग दासता विरुद्धके थरुहट थारुवान विशेष राष्ट्रिय सम्मेलन’ हुइ जैटी रहल बा । सम्मेलनमे मोर्चाके केन्द्रिय संयोजक लक्ष्मण थारु लगायत नेकपा, कांग्रेस, जसपा, राप्रपा लगायत सक्कु पार्टीके केन्द्रिय नेताहुक्रनसे सम्बोधन हुइना जनाइल बा ।
सम्मेलनके मूल उद्देश्य अक्के मञ्चमे सक्कु पार्टीके नेता तथा कार्यकर्ताहुक्रनहे उटारके थारुहुक्रनके हक अधिकार तथा न्यायके लाग ओइनके विचार बुझ्ना रहल जनाइल बा ।
मोर्चाके केन्द्रीय प्रवक्ता मीनराज थारु खासमे सक्कु पार्टीके नेता तथा कार्यकर्ताहुक्रनहे अक्के मञ्चसे थारुनके सवालमे आवाज उठ्वाइना हो । सदियौंसे अन्याय उत्पीडनमे रहल थारु लगायत अन्य समुदायके हक अधिकार न्यायके लाग अक्के मञ्चसे सम्बोधन करे लगैना हो ।
‘सक्कु पार्टीके नेताहुक्रनसे अक्के मञ्चसे अन्यायमे पारल वर्गहुक्रनके माग मुद्धाके लाग सम्बोधन करैना सम्मेलनके मुख्य उद्देश्य हो’, प्रवक्ता चौधरी कहलै–‘सम्मेलनहे सम्बोधनके लाग नेपाली कांग्रेस, नेकपा, जसपा, राप्रपा लगायत सक्कु पार्टीके केन्द्रीय नेताहुक्रे अइना बाटै ।’
सम्मेलन पाछे हुइना बन्दसत्रमे सक्कु पार्टीके केन्द्रिय नेताहुक्रन बिच हुइना छलफलमे आदिवासी जनजाति थारु लगायतसक्कु पहिचानबादीहुक्रनके लाग पार्टीगतसे उप्पर उठके पहिचानके सवालमे केन्द्रीत हुइना जनाइल बा ।
यकर साथे सम्मेलन मार्फत छुट्टे थरुहट थारुवान राज्यके माग, कैलाली क्षेत्र नम्बर १ से निर्वाचित प्रतिनिधिसभा सदस्य रेशमलाल चौधरी लगायतहे निःशर्त रिहाई, टीकापुर घटनाहे राजनीतिक घटनाके रुपमे लेटी घटनाबारे बनल छानविन समितिके प्रतिवेदन अविलम्ब सार्वजनिक करे पर्ना, ओस्टके भदौं ८ गते थारुनके घर, व्यवसायमे करल आगजनी, लुटपाट, चोरीमे संलग्नहे कारवाहीके लाग माग रहल बा ।
जातीय ऐतिहासिक पृष्ठभूमिके आधारमे संविधानमे पहिचानसहितके थरुहट स्वायत्त प्रदेश, सिमांकन, पूर्ण समानुपातिक निर्वाचन प्रणाली, राज्यके हरेक अंगमे जातीय जनसंख्याके आधारमा पूर्ण समानुपातिक प्रतिनिधित्व हुइ पर्ना माग कैना जनाइल बा । थरुहट तराई भुगोलमे रहल सक्कु सरकारी कार्यालयमे थारुभाषाहे सरकारी कामकाजके भाषा बनाइ पर्ना, लोकसेवाके विज्ञापन ओ संघीय निजामति ऐनहे संशोधन करे पर्र्ना माग फेन रहल बा ।

हजारौं युवानसे मार्चपास
शनिच्चरके रोज कैलालीके हसुलियामे हुइटी रहल ‘शान्ति सद्भाव न्याय ओ अधिकारके लाग दासता विरुद्धके थरुहट थारुवान विशेष राष्ट्रिय सम्मेलन’ मे एक हजार युवाहुक्रनसे मार्चपास कैना जनाइल बा ।
हसुलिया बजारमे हुइना सम्मेलनमे सुर्मीनालासे मञ्चसम युवाहुक्रनसे मार्चपास कैना मोर्चाके कैलाली संयोजक माधव थारु जानकारी डेलै । ओस्टके सम्मेलनमे सहभागिताके लाग कैलाली, कञ्चनपुर, दाङ, बाँके, बर्दिया लगायत परुव मेचीसम थारु कलस्टर रहल जिल्लासे ५०औं हजारके संख्यामे सहभागिता हुइना जनाइल बा ।
कैलालीके हकमे सम्मेलन हुइनासे सक्कु स्थानीय तहके थारु बाहुल्यता रहल गाउँटोलमे नगर स्तरीय, गाउँ स्तरीय, वडा स्तरीय समिति गठन करल बा । ओस्टके सक्कु गाउँघरके भलमन्साहुक्रनहे आआपन गाउँघरके जनताहुक्रनहे सम्मेलनमे सहभागिताके लाग उर्दी कराइल बा ।
यहोर सम्मेलनमे सहभागी हुइ अउइयाक्रनहे प्रहरी प्रशासनसे धरपकड नैकेडेना अनुरोध मोर्चा करले बा । मोर्चाके केन्द्रीय युवा संयोजक सीताराम थारु प्रहरी प्रशासनसे सहभागिहुक्रनहे धरपकड नैकैडेना अनुरोध करले बाटै । यदि प्रहरी प्रशासनसे कौनो मेरके धरपकड अथवा सम्मेलनके लाग अउइयाहुक्रनहे ज्यादती हुइ कलेसे अपनेहुक्रे फेन प्रतिकारमे उत्रना चेतावनी डेले बाटै ।

थप सम्बन्धित समाचार
Follow
Us