स्टार सिटीहे पाँचौ हाईलेण्डर फारवेष्ट पशुपति कपके उपाधि

-कैलारी अनलाइन

शनिवार, २५ माघ 6:24 PM

धनगढी, २५ माघ । पाँचौ हाईलेण्डर फारवेष्ट पशुपतिकप फुटबल प्रतियोगिताके उपाधि स्टार सिटी युवाक्लव हात परले बा ।
झण्डै नौ लाखनगदधनराशीके प्रतियोगिताके फाईनलमे सुदूरपश्चिम ११ हे १–० से पराजित करटी स्टार सिटी उपाधि उपर कब्जा जमाइल हो । स्टार सिटीके उपाधिमे विक्रम सिंह निर्णायक गोल करल रहिट । उहाँ पहिल हाफके ईन्जुरी समयके एक मिनेटमे गोल करल रहिट । विदेशी खेलाडी ओरियलके पासमे विक्रम सुन्दर गोल करल रहिट । प्रतियोगिताके विजेता बनल स्टार सिटी पाँच लाख नगदसहित ट्रफी ओ मेडल पैले बा ।
उपविजेता बनल सुदूरपश्चिम ११ धनगढी २ लाख ५० हजार हात परले बा । माघ १७ गतेसे सुरु हुइल प्रतियोगिता शनिच्चरके सम्पन्न हुइल बा । पाँचौ संस्करणके विजेता बनल स्टार सिटी प्रतियोगिताके टमान विधामे समेत कब्जा जमैले बा ।


स्टार सिटीके कुवेर सिंह प्रतियोगिताके उत्कृष्ट खेलाडी नल बाटै । उहाँ नगद २५ हजार प्राप्त करले बाटै । उत्कृष्ट प्रशिक्षक स्टार सिटीके कुमार शाही, उत्कृष्ट गोलरक्षक स्टार सिटीके प्रियम खड्का, उत्कृष्ट रक्षक स्टार सिटीके राकेश हमाल, सर्वाधिक गोलकर्ता स्टार सिटीके विक्रम सिंह हुइल बाटै । ओस्टके उदयमान खेलाडी फारवेष्ट पशुपति युवा क्लबके रोहित सिंह हुइल बाटै । उहाँहुक्रे जनही १५–१५ हजार रुपैयाँ पुरस्कार पैले बाटै । विजयी खेलाडीहुक्रनहे एक समारोहके बीच नगद सिल्ड तथा पुरस्कार वितरण करल बा । आयोजक फारवेष्ट पशुपति युवा क्लबके अध्यक्ष खेम रावतके अध्यक्षतामे हुइल समापन समारोहके बर्का पहुना धनगढी उपमहानगरपालिके मेयर नृप ओड रहल रहिट ।
प्रतियोगिताके पाँचौं संस्करणके मुख्यप्रायोजक हाईलेण्डर प्योर ह्वाईट भोड्का रहल रहे । प्रतियोगिताके सह–प्रायोजकके रुपमे एडभेन्चर वेष्ट होलिडेज ओ टिकट प्रायोजकके रुपमे एक्सप्रेस अटो केयर रहल रहे । फारवेष्ट पशुपति युवा क्लब छैँटौ राष्टिय खेलकुद प्रतियोगितामे सुदूरपश्चिमहे पदक जितुइया खेलाडीनसे स्थापना करल क्लब हो । उहाँहुक्रे विगत पाँच बरससे अपने नाइ खेलके सुदूरपश्चिममे ऐकेडेमी स्थापना कैना उद्देश्यसे फारवेष्ट पशुपति कपके आयोजना करटी आइल बाटै ।

थप सम्बन्धित समाचार
Follow
Us