‘व्यवसायीक एकता ओ आर्थिक समृद्धिके लाग मोर उम्मेदवारी’

-kailarionline

मङ्गलवार, २४ पौष 9:34 AM

कैलाली उद्योग वाणिज्य संघके चुनाव लक्याइटी रहल बेला अध्यक्षके उम्मेदवार लगायत चुनावमे उत्रल व्यवसायीहुक्रनहे चुनावी सरगर्मी बह्रल बा । यिहे पुस २८ गते हुइना संघके चुनावमे तीनठो प्यानल चुनावी मैदानमे उत्रल बावै । उम्मेदवारहुक्रे आपन जीत सुनिश्चित करक लाग प्रचारप्रसार सहित तमान प्रतिवद्धता लेके रात दिन व्यापारीहुक्रनसे भेटघाट कैनामे व्यस्त रहल बाटै । उहे मैदानमे युवा व्यवसायी पुष्पराज कुँवर फेन अपान टीम लेके मैदानमे उत्रल बाटै । विगत २५ बरससे व्यवसाय करटी आइल कुँवर बडिमालिका मार्केटिङ्ग, बडिमालिका एग्रोइन्डस्ट्रिज, होटल फ्लोरा ओ श्याम सुन्दर निर्माण सेवाके अनर फेन हुइट । व्यस्त समयके बावजुद अध्यक्षके उम्मेदवार कुँवरसे करल बातचितके सम्पादित अंशः
१. यहाँहे स्वागत बा ।
–धन्यवाद
२. चुनावी चहल पहल कत्राके बह्रल बावै ?
–चुनावके मिति लच्यासेकल बावै । यकरसाथे चुनावी चहल पहल फेन बह्रना स्वाभाविक होवई । संघके लौव नेतृत्व चयनके लाग उम्मेदवार लगायत यहाँके व्यपावारीनमे फेन चुनावी सरगर्मी बह्रल बावै । सक्कु उम्मेदवार आपन जीत सुनिश्चिताके लाग प्यानल सहित व्यापारीनहे भेटघाट कैनामे व्यस्त बाटै । ओकर संगे व्यापारीनके पीडमर्का, समस्या बुझ्टी रहल बाटै । मोर नेतृत्वके प्यानल फेन चुनाव प्रचार प्रसारमे व्यस्त बावै ।
३. चुनावके बेलामे किल व्यापारीनसे भेटघाट कैना गुनासो रहल बा जे ?
– पक्के फेन व्यापारीनसे उ गुनासो अइना सकारात्मक पक्ष हो । यहाँके व्यापारीनके तमान समस्या बा । जौन चुनावी दौरानमे हमारठन गुनासो करले बाटै । यहाँके व्यापारीहुक्रनके हकहित संरक्षण तथा प्रर्वर्दन करेक लाग कर, भन्सार, बीमा, बैंक ओ आवश्यक सुरक्षा प्रदान कैना समस्या रहल बा । यी विषय ओर हम्रे ध्यान डेले बाटी । कलेसे व्यापारीन ओरसे अइना गुनासोहे सकारात्मक लेटी हमार नेतृत्व आइ कलेसे यी विषयहे कार्यान्वयन कैना ओर विशेष प्राथमिकता रही ।
४. अपनेहुक्रे व्यापारीनसे कैसिन प्रतिक्रिया पाइटी टे ?
–मजा प्रश्न करली । चुनावी दौरानमे हमार प्यानल यहाँके उद्योगी, व्यापारीनसे बहुट मजा प्रतिक्रिया पैटी रहल बावै । मोर यी संघमे तीन कार्यकाल फेन होसेकल । मै सक्कु व्यापारीनसे प्रत्यक्ष अप्रत्यक्ष रुपमे नज्दिक रहल बाटुँ । सक्कु व्यापारीनके गुनासो सुन्ना मौका पाइल बाटु । यहाँसम कि मै उहाँहुक्रनके परल समस्याहे समाधान फेन कैले बाटुँ । संघमे मोर दुई कार्यकाल सदस्य ओ एक कार्यकाल कोषाध्यक्षके अनुभव रहल बा । जिहीसे मै सक्कु व्यापारीनसे टचमे बाटुँ । उहाँहुक्रनके सहयोगसे नै मै नेतृत्वके लाग आगे आइल बाटु । विश्वास बा महिन सक्कु व्यवसायीहुक्रे सहयोग करही ।
५. अपनेक उम्मेदवारी काहे ?
–मै अगही कहिसेकल बाटुँ कि मै संघके ३ कार्यकालमे बैठसेकल बाटुँ । मै सक्कु व्यापारीनके पीडमर्का लग्गेसे बुझ्ले बाटुँ । मोर चुनावी नारा नै ‘व्यवसायीक एकता ओ आर्थिक समृद्धि’ के लाग रहल बा । सबसे पहिले यहाँके व्यापारीनहे एकतावद्ध कैके व्यापार व्यवसायसे नै यहाँके समृद्धि कैना लक्ष्य हो । विगतसे संघसे सुदूर पश्चिमे रख्टी आइल २१ बुँदे माग मध्ये पुरा नाइ हुइल माग पुरा कराइक लाग निरन्तरता डेना, सुदूर पश्चिम प्रदेशके आर्थिक समृद्धि करक लाग विशेष क्षेत्र (सेज), व्यवसायीक क्षेत्र ओ सुख्खा बन्दरगाह स्थापनाके लाग मोर उम्मेदावारी हो ।
ओस्टके संघसे आवद्ध व्यपारीनके लाग डिजिटल परिचय पत्रके व्यवस्था, आवद्ध हुइ चहुईया व्यपारीनके लाग फेन डिजिटल प्रविधि प्रयोग कैके सदस्यता डेना, व्यवसायीक पीडमर्का बुझक लाग हेल्प डेस्कके व्यवस्था, फोहोर मैला, पार्किङ्ग, शौचालय व्यवस्थापन, बजारहे व्यवस्थित करक लाग सडक बत्ति, सिसि टिभी, प्रहरी बिटके स्थापना, गौरीफन्टा नाकाहे स्तरोन्नती, करहे मैत्रीपूण बनैना, अनियन्त्रित घरभाडाहे व्यवस्थित ओ बैज्ञानिक बनैना मोर पहल रही । यकर साथे तमान व्यवसायीहुक्रनके हकहित, सुरक्षा, विमा, स्वास्थ्य, बजारीकरण कैना, कृषिजन्य बस्तुमे डेखगैल निर्यातके लाग भारतीय भन्सारमे प्लान्ट क्वारेन्टाइनके लाग विशेष पहलके लाग मोर उम्मेदावरी रहल बा ।
६. अपनेक जित्ना आधार का हो ?
–एकदमे मजा प्रश्न करली । हमार प्यानलके जित हुइना कहलक व्यापार व्यवसायमे भिजल उम्मेदवार बाटै । अनि सक्कु क्षेत्र समुदाय ओरसे समेटके समावेशी प्यानल फेन बनैले बाटी । व्यापारीनके दुःख सुख नजिकसे बुझ्ले बाटी । यी सक्कु ओरसे हेरलेसे सक्कु व्यवसायी मोर टीमहे सपोर्ट करही कना महिन लागठ् ।
७. अन्तमे का कहे चाहटी ?
–धन्यवाद कैलारी अनलाइन टीम हे । साथे सक्कु व्यवसायीहुक्रनहे सही नेतृत्वके लाग कुँवर प्यानलहे सहयोग कैना आग्रह करटु । धन्यवाद ।

 

थप सम्बन्धित समाचार
Follow
Us