‘बीआइएम ओ बीएचएम विषय पह्रके बेरोजगार बैठे नाइ परी’

-kailarionline

मङ्गलवार, २६ भाद्र 8:42 AM

प्रदेश नं. ७ के अस्थायी राजधानी धनगढी उपमहानगरपालिका वडा नं. २ सन्तोषी टोल स्थित सुदूरपश्चिमाञ्चल क्याम्पस (एसपिए) उच्च परीक्षा परिणाम, विद्यार्थीके व्यक्तित्व विकासमे प्राप्त सफलता ओ सामाजिक उत्तरदायित्व वहन कैना कार्यमे प्राप्त उब्लब्धीके कारण देशके अग्रणी शैक्षिक संस्थानमे स्थान बनैना सफल हुइल बा । विगत १९ बरससे योग्य, सक्षम ओ असल विद्यार्थी उत्पादन करटी आइल क्याम्पस यिहे शैक्षिक सत्रसे प्रदेश नं. ७ अन्र्तगत सबसे पहिले त्रिभुवन विश्वविद्यालयके सम्बन्धनमे स्नातक तहमे बीआइएम ओ बीएचएम विषयके पह्राइ सुरु करले बा । प्लटु ओर विज्ञान, व्यवस्थापन, शिक्षा ओ मानविकी संकाय, स्नातक तह ओर व्यवस्थापन, शिक्षा ओ मानविकी संकाय ओ स्नाकोत्तर ओर एमविएस ओ एमएड संकाय रहल क्याम्पसमे यिहे लौव शैक्षिक सत्रसे सुरु हुइल एकदमे लौव विषय बीआइएम ओ बीएचएम बारे सहायक क्याम्पस प्रमुख बुधराम चौधरीसे करल बातचितके सम्पादित अंश ।

 

 

–स्वागत बा यहाँ हे ।
धन्यबाद ।

 

– बीआइएम ओ बीएचएम कौन मेरके विषय होवई ?
बहुट मजा प्रश्न करली । बीआइएम ओ बीएचएम विषयक यहाँके विद्यार्थीनके लाग एकदमे लौव तथा सामान्य विषयसे फरक विषय हो । यी विषय बीबीएस, बिएड ओ बीए विषयसे फरक खालके हो । काठमाण्डौं लगायत देशके कुछ ठाउँमे यी विषयके पह्राइ हुइठ् । मने प्रदेश नं. ७ मे भर सुदूरपश्चिमाञ्चल क्याम्पस सबसे आघे यी विषयके पह्राइ कैना सुरुवात करे खोजल बा । बीआइएम ओ बीएचएम यी दुनु विषय प्राविधिक विषय अन्र्तगत परठ् । पाछेक समय प्राविधिक विषय ओर विद्यार्थीहुक्रनके आर्कषण बह्रटी रहल ओरसे विद्यार्थीनके आवश्यकता तथा यी क्षेत्रके स्कोप हेरके क्याम्पस पहिलचो यी प्रदेशमे पह्रैना सुरु करल हो ।

 

–बीआइएम ओ बीएचएम विषयमे का सम्बन्धी पह्राइ हुइठ् ?
मै पहिले कहिसेकल बाटु कि यी दुनु विषय प्राविधिक हो । विआइएम ओर ब्यवस्थापन ओ कम्प्युटर शिक्षा पह्राइ हुइठ् । यम्न ४० प्रतिशत व्यवस्थापन ओ ६० प्रतिशत कम्प्युटर सफ्टवेयर पह्राइ हुइठ् । बिबिए जस्टे यी फेन ४ वर्षे कोर्ष हो । यम्ने विद्यार्थीनहे विजनेश इन्फर्मेशन सिस्टम, विष्लेषण, डाटा प्रोसेसिङ, नेटवर्क विस्तार, सफ्टवेयर निर्माण लगायतके पह्राइ हुइठ् । व्यवस्थापकहे आवश्यक सफ्टवेयर निर्माण कैना औरे जनशक्ति खोजे नपरे कना यी विषयके उद्देश्य हो । यी दुनु विषय पह्रक लाग प्लस टु पास करल जोकोइ विद्यार्थी पह्रे सेकही ।
ओस्टके विएचएम एकठो होटल म्यानेजमेन्ट सम्बन्धी विषय हो । यी विषय अध्ययनपाछे सोझे रोजगार पाइ सेकजाइठ् । यी विषय पह्रके प्रमाणपत्र किल नाइहो, सीप फेन आर्जन हुइठ् । नेपाल जैसिन पर्यटकीय सम्भावना बोकल मुलुकके लाग उपयुक्त विषय फेन हो । यी विषयमे पाककलासे पहुना सत्कारसमके ज्ञान डेजाइठ् ।
होटल म्यानेजमेन्ट नेपालमे किल नाइ होके विश्व बजारके लाग जनशक्ति उत्पादन कैना हुइल ओरसे पर्यटन व्यवसायसे सम्बन्धित दक्ष जनशक्तिहे रोजगारीके ढोका खुला रहना रहठ् । यी विषय अन्तर्गत फुड प्रोडक्सन, हाउस किपिङ, हस्पिटालिटी म्यानेजमेन्ट, मार्के्िटङ, फ्रन्ट अफिस, सर्भिस जैसिन विषय पह्राइ हुइठ् । यी विषय पह्रुइयाहुक्रे होटल, ट्राभल एजेन्सी जैसिन सेवाके लाग कौनो फेन क्षेत्रमे काम करे सेकजाइठ् । हमार क्याम्पसमे यी दुनु विषय चारवर्षे कोर्समे आठ सेमेस्टरमे पह्राइ हुइना हो ।

 

 

–यी विषय पह्रसेकल पाछे यकर डिमान्ड कैसिन बावै ?
–यी दुनु विषयके सम्भावना फेन बा ओ ढिउर माग फेन रहल बा । मै यी विषयके बारे उप्पर जानकारी करासेक्ले बाटुँ । यी दुनु विषय पह्रलेसे वेरोजगार बैठे पर्ना अवस्था नाइहो । खास कैके बीएचएम विषय अध्ययन कैलेसे नेपालके कन्टेक्समे हेर्ना हो कलेसे भर्खर होटल तथा टुरिज्म क्षेत्र फस्टैटी रहल बावै । यी विषय पह्रलेसे पैसा फेन खेरा नाइ जाइ कलेसे पह्रल विषयके सही सदुपयोग फेन हुइ । बीएचएम विषय पह्रल जे कोइ यहाँ ओस्टे खाली बैठे नाइ परी । बीएचएम विषय पह्रलेसे अपनहे होटल सञ्चालन करे सेक्नाके साथे बराबरा होटलके म्यानेजर बन्ना ढिउर सम्भावना रहल बा । कलेसे दोसर ओर देश तथा विदेशमे फेन जाके सहजे रोजगारी पाइ सेक्ना सम्भावना रहल बा ।
ओस्टके बीआइएम ओर फेन अध्ययन पश्चात खाली बैठे पर्ना अवस्था नाइहो । यी विषय पह्रलेसे खास कैके आइटी ओर ढिउर सम्भावना रहल बा । देश अब्बे संघीय संरचनामे जासेकल ओरसे सक्कु स्थानीय तहहे आइटी अफिसरके आवश्यकता रहल बा । जौन यी विषय पह्रलेसे उ क्षेत्र ओर जाइ सेकजाई । कलेसे दोसर ओर सूचना प्रविधीके जमाना रहल ओरसे विजनेश इन्फर्मेशन सिस्टम, विष्लेषण, डाटा प्रोसेसिङ, नेटवर्क विस्तार, सफ्टवेयर निर्माण कैके यिहे क्षेत्रमे रोजगार सृजना करे सेकजाइ ।

 

–यी विषय पह्रना कत्रासम खर्च लागठ्, छात्रवृतिके कैसिन व्यवस्था रहल बा ?
पक्के फेन यी विषय अध्ययनके लाग अन्य सामान्य विषयसे खर्चिलो बावै । यी दुनु विषय चारबर्षे कोर्ष होवई । मने यी विषय सेमेस्टर बाइज पह्राइ हुइना हुइल ओरसे पह्राई शुल्क फेन सेमेस्टर बाइज तिरे पर्ना रहल बा । ओस्टके हमार क्याम्पस ओ तमान संघसंस्था बिच फेन समन्वय सहकार्य हुइटी बावै । महिन लागठ् उ संघसंस्थासे समन्वय साहकार्य हुइ कलेसे पक्के फेन यहाँके विद्यार्थीहुक्रनहे पह्राइमे सजता हुइ । हमार यहाँ सुरुवातीमे बिएचएम ओर चार बरसके मोटामोटी चारलाख ९३ हजार जत्रा खर्च लागी कलेसे बीआइएम ओर चारलाख ४९ हजारसम खर्च लग्ना बा । ओस्टके यी विषय पह्रुइया सक्कु विद्यार्थीनके लाग छात्रवृतिके फेन व्यवस्था रहल बा ।

 

–यी विषय पह्राईके लाग क्पाम्पसमे दक्ष जनशक्ति लगायत अन्य भौतिक संरचना कैसिन रहल बावै ?
एकदम सही प्रश्न करली । पक्के फेन यहाँ दक्ष जनशक्ति रहल बाटै । मने यी विषय यी क्षेत्रके लाग लौव विषय रहल ओरसे अध्ययन अध्यापनके लाग देशके तमान कलेज तथा देश बाहरसे विज्ञ अध्यापक हुक्रनहे हायर कैके फेन यहाँ हम्रे अध्ययापनके व्यवस्था मिलैबी । कलेसे हमार यहाँ अपने भौतिक संरचना पर्याप्त मात्रामे रहल बावै । ओस्टके दुनु विषयके प्राक्टिकलके लाग अपने संरचना बनैबी कलेसे होटल म्यानेजमेन्टके लाग भर देश तथा देश बाहरके चाइना, अमेरिका लगायन अन्य देशके बराबरा होटलमे इन्टर्नके लाग पठैना व्यवस्था रहल बा । मने पह्राइ बाहेक इन्र्टनके लाग भर विद्यार्थीहुक्रे अपनहे खर्च व्यवहोरे पर्ना रहल बा ।

 

–अन्तमे, का कना चाहबी ?
सबसे पहिले टे धन्यबाद डेना चाहटु हजुरहे । हमार क्याम्पसके तथा लौव विषयबारे सूचना प्रवाह करल ओरसे । यकर साथे मै यहाँके विद्यार्थी तथा अभिभावकहुक्रनहे का कना चाहटु कलेसे यी विषयबारे क्याम्पसमे आके बुझ्ना आग्रह करटु । यी विषयके सम्भावना ढिउर रहल ओरसे यी विषयमे करल लगानी खेर नाइ जाई कना चाहटु । अन्तमे थारु समुदायके अट्वारी ओ तीजके शुभकामना समेत व्यक्त कैना चाहटु । धन्यवाद ।

थप सम्बन्धित समाचार
Follow
Us