पूर्वमन्त्री रामजनम खोल्लै थारु फुडल्याण्ड रिसोर्ट

-kailarionline

सोमवार, ११ चैत्र 12:55 PM

धनगढी, ११ चैत । पूर्वमन्त्री रामजनम चौधरी थारु संस्कृतिके प्रवद्र्धनके साथे पर्यटन विकासहे बढावा डेहक लाग कैलालीके जोशीपुर गाउँपालिका–४ झवही चोकमे थारु फुडल्याण्ड रिसोर्ट संचालन करले बाटै । थारु कला, संस्कृतिहे प्रवद्र्धनके लाग दुई करोडसे ढेर लगानी लगाके संचालनमे नानल रिसोर्टके उदघाटनफे गाउँक बायो वृद्धा जेष्ठ नागरिक गंगुदास चौधरीसे करुवागिल बा । बायोवृद्धा चौधरी रिसोर्टमे पैठना डुवारके भित्तर गेटमे रेबान काटके उदघाटन करले रहिट ।
रिसोर्ट उदघाटनपाछे संचालक तथा पूर्वमन्त्री रामजनम चौधरी थारु कल्चरहे प्रिजर्व कैना गाउँघरके रिमोट क्षेत्रसे थारु फुडल्याण्ड संचालन नानल बटैलै ।

‘बहुट संघरिया शहर बजारमे रिसोर्ट संचालन कैना सल्लाह डेलै,’ पूर्वमन्त्री चौधरी कहलै, ‘गाउँघरके विकास हुइलेसे केल और ठाउँक विकास हुइना हुइल ओरसे मै गाउँठाउँमे रिसोर्ट खोल्नु ।’
रिसोर्टमे अउइयाके लाग रमाणीय, पारिवारिक वातावरण, ३–४ सय जाने अटैना सेमिनर हल, एसी कोठाके व्यवस्था, टरे मच्छरी पालल रना ओ उप्पर खरले छाइल रेष्टयूरेन्ट रहल बा ।

 

 

‘थारु संस्कृति लोप हुइटी रहल बा, यहाँ अइना आन्तरिक वा बाहिय पर्यटक रिसोर्टमे थारु खानपान पैनाके साथे गाउँठाउँक अवलोकन करे सेक्ना उहाँ कहलै । उहाँ कहलै ढेर ठाउँमे थारु संस्कृतिके नाउँमे दोहन हुइटी रहलेसेफे मै वास्तविक, संस्कृतिहे प्रिजर्व करेक लाग डगौरा थारु, कठरिया ठाउँ, रानाथारु लगायत जत्राफे थारु समुदायके कला, संस्कृति भेषभुषा बा उहीहे समेटना प्रयास कैटी बाटु, ओकरसंगे थारु संग्राहलयफे बनी ।

पूर्वमन्त्री चौधरी कहलै यहाँ भारी–भारी होटल, रेष्टयूरेन्ट, रिसोर्ट तिब्र गतिमे खुल्टी बा, मने कल्चरसंग नाइजोरल कारण मोर अपने सलोगन बा, ‘अपन संस्कृतिहे जोगाई, पर्यटनहे बढावा डि ।’

 

 

‘अब्बे देशके मेरुडण्ड पर्यटनमे टिकल बा,’उहाँ कहलै ‘पर्यटनसे टमान मनै रोजगारीफे पैले बाटै, आन्तरिक होए वा, बाहिय पर्यटकसे मुद्राशक्तिफे बह्रद बा, यकर कारण पर्यटनहे बढावा डेना मै थारु फुडल्याण्ड रिसोर्ट रिमोट क्षेत्रमे खोल्नु ।’
उ रिसोर्ट टीकापुरसे ७ किलोमिटर, जोशीपुर बजारसे लग्गे, महेन्द्र राजमार्गसे १२–१३ किलो मिटरके दुरीमे रहल बा । जनतनहे सेवा डेहक लाग अपन राजनीतिक यात्र जारी रहना मने, थारु कला, संस्कृतिहे बढावा डेना रिसोर्ट संचालनमे नानल संचालक तथा पूर्वमन्त्री चौधरी कहलै । दिनके पार्टीके काममे खटना ओ साँझके रिसोर्टके काम हेरना उहाँ कहलै ।
पूर्वमन्त्री चौधरी २०४८ सालसे २८ बरसके उमेरमे नेपाली काँग्रेसके ओरसे प्रतिनीधि सभाके सांसदमे निर्वाचित हुइल रहिट । उहाँ स्वास्थ्यमन्त्री लगायत टमान चो राज्यमन्त्रीफे हुसेकल बाटै ।
थारु फुडल्याण्ड रिसोर्टमे थारु परिकार घोंघी, गेंघटा, लोकल मुरगी, बंगुर सिकार सुकुटीके साथे और थारु परिकार मिल्ना जनागिल बा ।

पहुरा थारु दैनिकसे

थप सम्बन्धित समाचार
Follow
Us