थारु समुदायम डश्या

-कैलारी अनलाइन

शनिवार, १३ मंसिर 12:05 PM

निता चौधरी


डश्या थारु समुदाय ओ गैर थारु समुदाय सक्कुजन १५ दिनसम्म धुमधामक संघ मन्ठ । तर डश्या कटिकी सुनबेर ओ डश्या कैक नाउँ केल लिहेबेर एक्क लग्लसेफे थारु ओ गैर थारुहुक्र डश्याममनैना तरिका ढिउर फरक बा । लगभग तिथिमिति उहो रलहेफे मन्ना ओ मनैना रितिथिति, सामाजिक मुल्य मान्यता फरक पाजाइठ् । थारू समुदायम डश्या २ तरिकासे मनाजैठा । एक्ठो दृष्टिकोणले हेर्लसे खानपिन, रमाइलो ओ डिउँटामाटा मन्ना कना बुझ्जैठा कलसे और दृष्टिकोणले हेर्लसे आपन पूर्खाहुकन्हक मृत–आत्मा हुक्र शान्ति पाइट कैख पुर्खाहुकन्हक सम्झनाम मनाजैठा कना मान्यता पाजिठा ।


यहीम एक मत निरहल पाजैठा काजे कि आघक हामार पूर्खाहुँक्र जसहँक वुझ्टि अइल ओसहक पाछक पुस्ता हुन वुझैटि अइल उहोमार असिन डुई मत पागिल फे हो कि कना महसुश हुइठा ।
डिउँटा लहैना काम थारू समुदायम मर्नि–कर्नि म छूट मन्ना चलन अनुसार डश्याम पूर्खाहुकन्हक मृत्युक कारण छूट मान्जिना ओर्से डिउँटा लहैना काम हुइठा । स्वानपानी हे च्वाखा पानी कैख उहो पानीले च्वाखा बनाजाइट । थारु रहसेफे डिउँटा ओ थर अनुसार पुजाआँटी कैजिठा । मुओल मनैन्हक सम्झनाम पिट्टर डेजिठा । गुर्वा हुकन्हक सेवा ओ सम्मानक लाग घरगुर्वाह टिका लगैनाफे कैजिठा । उहो मार थारु समुदायम शोकम डश्या मनाजैठा कलसे गैर थारु समुदायम विजय प्राप्त हुइलक उल्लाहसमय सम्झनाम डश्या मनाजाइठ । तर अत्र कटिकि मुओल मनैन्हक सम्झना केल निहोक घरक डिउँटामाटा मन्ना ओ खानपनिक टिह्वारक रुपमफे लेजिठा । थारु समुदायम डश्यक उज्जर टिका लगैठ । शान्तिक प्रतीक उज्जर टिका हुइलक ओर्से थारु समुदायम उज्जर टिका लगाख डश्या मनाजैठा । थारून्हक आपन मौलिक डिउँटा खेंखरी–मैयाँ, सौंरा, लागुबासु, धम्रज्वा , चुरिनियाँ, भेंर्वा, पुर्वी लगायतक डिउँटा हुकन जल, मद्य, जिउँरा र बेब्री चह्राक परम्परागत मान्यता अनुसार पूजा कर्ठ ।


थारु समुदायक डश्या जिउँरा ढर्लक दिनसे सुरु हुइलसेफे खास डश्या अष्टमीहन मान्जाइठ । थारु समुदायम डश्या अष्टमीतिथिसे सुरु हुइठा । डश्यक लाग कोक्नीक जिउँरा (घटस्थापना) ढरल लिनसे जो सक्कुन्हक घर घरम डश्या सुभारम्भ हुइना कर्ठा । थारु समुदायम ई टिह्वारहन १५ दिनसम्म धुमधाम्कसंघ मनैना कैजिठा । थारु ओ गैर थारु समुदायम ई टिह्वारह फरक फरक परम्परा तथा आपन आपन मौलिक परम्परा अनुसार मनाजैठा । गैर थारुहरुहुकन्हक महान पर्व डश्याह लिहेल अस थारु सम्ुदायमफे डश्याह धुमधामकसंघ मनाजाइट । डश्या अइनासे कुछु दिन पहिल थारु समुदायम डश्यक चहलपहल बह्रर्ठा । बन्वा जैना, पट्या टुर्ना, भ्यालक पट्या अन्ना काम हुइठा । ओस्टक घर निप्ना ओ गाउँम सखिया नाच नच्नाले झन चहलपहल बह्रर्ठा । तर पाछक समयम गाउँम सख्या नाच् नाच छोर स्याकल बाट । जुन थारु समुदायक लाग चिन्ताक विषय बनल बा । गैर थारुहुकनसे फरक संस्कृति बाक्लक थारु समुदायम बाहेक और समुदायम सदिया नाच निनाच्जाइट । थारु समुदायक छुट्टै पहिचान बोक्लक सख्या नाच पहिलसे आजकाल ढेर लोभ होस्याकल बा । याकर खोजीनिति निकर्ना हो कलसे ओ संरक्षणम ध्यान निपुगैना हो कलसे सख्या नाच ओ सख्या गीत ख्वाजबेर फे निभेट्जैना दिन निआई कह निसेक्जाइ । थारु समुदायम डश्यम नम्हेरीक पट्या ओ भ्यालक पट्या निहोख निहुइट कना थारु समुदायम परम्परागत मान्यता रहल बा । नम्हेरिक पट्या पट्री लगैनासे लेक हरेक कामम पट्यक आवश्कता पर्ठा कलसे बह्रीक ड्वारीठे दलिनम पचुई गोँस्ना भ्यालक पट्या काम लागट । ऊ पट्यम ढिक्रह्वक (अष्टमीक) दिन सन्झ्याक ढिक्री पुज्क सेक्क पचुई ढर्ना कर्ठ ।


थारु समुदायम जिउँरा ढर्लक दिनसे डश्या सुरु हुइलक मान्गिलसेफे डश्या) ढिक्रह्वा अर्थात अष्टमी तीथिक दिनसे सुरु हुइठा । पञ्चमीक दिनसे अष्टमी तीथिसम्म प्रत्येक घरसे एक जन आपन घरगु¥वक घर एक करै मद्म, एक झ्वाँटा कोक्नी लेक बानधुप लिहे जैठ । पहिल घरक गढु¥या केल लिहे जैना चलन रह तर पाछक समयम ई चलन हेरैटी जाइटा । आब जे फे जाइ सेक्ठ । ओ धुप आन्ख डिउँह्रार झ्वँरेम ढर्ना कर्ठ । डिउँटामाटन धुपाइग लाग चहठ । बानधुप घरक घरगु¥वा बाहेक औरजन डेलक मान्यता निहुइट कना चलन पहिलहेसे बा । ओसहक थारु समुदायम डश्यक डिउँटा (घोर्वा) हन पुनः स्थापना करपर्ठा । सप्तमीक दिन डिउँटा पुज्ना ढिक्री बनैना पैनस्टोपी ढुइठ । ढिक्रह्वक दिन डिउँटा पुज्ना सात प्रकारक ढिक्री बनाइ पर्ठा । गुले¥वा ढिक्री, ब्वाझा ढिक्री, छिट्वा, दिन, जोन्ह्या लगायतक ढिक्री बनाख सन्झ्याक पुज्ठ । बेबरीक फुला ओ कोक्नीक जिउँरा फे पट्रिक उपरसे ढरल रहठ । पुरान घोर्वाहन लौव बनैठ । ढिक्री पुजबेर मन्द्रा बजैठ ओ बर्कीमार गैठ । पुज्क सेक्लसे सक्कुजन रमाइलो कर्टि ढिक्री खैना ओ बर्कीमार गैना कर्ठ । बेब्री बिना थारुन्हक डश्या असम्भव बा । उहो मार सक्कुन्हक घरम बेब्री लगाइल रहठ । ढिक्रह्वक दिन मटान घर रातभर सख्या ओ पैयाँ नाच नच्ठ । बास्तवम संख्या ओ पैँया नाचक सद्भावका बारेम पौराणिक आख्यान बा । थारु समुदायम मानव बलीक रुपम काँेह्रक बली डेठ । नवमीक दिन थारु हुक्र डिउँटा पुज्क सेक्ख पहिल मुओल मनैन पिट्टर खाए बलैठ । पिट्टर बाबा रहल मनै निडेट ओ पिट्रौन्हा भात टिना छावा , नट्यहुक्र केल खैठ । पिट्रौन्हा टिना विजोरा रहठ । मच्छी, लाहिक साग, उरुद लगायतक टिना रठा । थारु समुदाउम नवमीक दिनह गवल्या टीकाक दिन फे कैजाइठ । गाउँक सक्कु घरसे एकजन जन्नी मनै ओ एक जन थारु मनै करैम मद्य ओ बेब्री जिउँरा लेक टिका लगाए जैठ । मटाँवह बेब्रीक माला लगाडेठ ओ मटाँवा सक्कु गाउँले हुकन टिका लगाडेठ । डश्या, सदभाव, भाईचारा ओ खानपिनक टिह्वार हुइलक ओर्से उज्जर टिका, जिउँरा ओ वेव्री लगाक रमाइलो कर्ठ । सन्झ्या सन्झ्या लौव भ्वाज करल जिउँरहोन जिउँरा लगाए जैठ । दशमीतीथिक दिनह थारु समुदायम राजा टिका अर्थात रज्वा टिकाक दिन फे कठ । ई दिन घरक घरगुर्वाह टिका लगैठ । आपनसे बरा मनैनसे टिका लगैना ओ आशिर्वाद लेना फे कर्ठ । दशमी डश्यक अन्तिम दिन तथा दशमी तिथिसे थारुन्हक डश्या ओरैठा तर सख्या नाच भरी डिउँटा निबैठाइट सम्म नच्टिरठ । डश्यक एक दुइ दिन पाछ सख्या गीत ओराख डिउँटा बैठैलसे सख्या गीत ओ पैँया नाच समापन हुइठा ।


आधुनिकीकरण हुइटी डश्या


थारु समुदायम मनाजैना हरेक टैटिह्वारक आपन महत्व बाटस । ओ टैटिह्वार मनैना तरिका फे आपन मेह्रिक बा तर थारु समुदायम आपन चालचलन, रितिभाँट अनुसार निहोख आधुनिकताह प्राथमिकता डेटी जाइट डेख्परठ् । आजकाल आधुनिकिकरण कर्ना नाउँम आपन मौलिक परम्परा निहोख पाछपाछ अइलक लौव लौव रितिरिवाजह मन्टी जाइट । समय परिवर्तन ओ लौव लौव चिजह अनुशरण कर्लक मार मौलिक पहिचान बचैना निहोख आधुनिकताह आघ बह्रैटी बाट । थारु समुदायक मनै जो मौलिक गीतबास गाइ छोर्क साउन्ड सिस्टमम गीत बजाख लौवलौव मेह्रिक गीत गैना ओ नच्ना कर्ठ ।
यहिह मान निहुइट कना ट निहो मन्ना मजा हो तर पाछ ओर्से अइलक कारण थारुन्हक मौलिक पहिचानम विकृति थप्गिल जसिन मान्जाइट ।


चुनौती
थारु समुदाय ओ थारु समुदायहुक्र मनैना डश्या डेवारी केल निहोक हरेक चिजम ढेर चुनौती डेख्परल बा । काजे कि थारु समुदाय आधुनिकताक नाउँम देखासिकी ह प्राथमिकता डिहेट डेख्परठ ओ लौवलौव चिजह अप्हन अनुशरण कर्टि जाइट । थारु समुदायक मौलिक कला संस्कृति केल निहोक थारु समुदायम मनाजैना हरेक टैटिह्वारम फे आधुनिकता भिट्टर स्याकल बा । उहो मार पहिल ओ आजकाल थारु समुदायम डश्या डेवारी मनैना तरिका पहिलसे फरक बा ।

आधुनिकीकरणक नाउँम विकृति अइटी बा तर थारु मसुदायक मनै विकृतिह संस्कृति बनाक आघ बहर्टी रलक पाजाइट उहोमार आधुनिकीकरणक नाउँम भित्र्यइटीरलक विकृति थारु समुदायम भारी चुनौतीक रुपम रहल बा । समय परिवर्तन संगसंगे परिवर्तन हुइपर्ठा तर परिवर्तन हुई पर्ठा कतिम आपन मौलिक पहिचान विर्साए लग्लक पाजिठा । पहिल उज्जर टिका लगैना थारु समुदाय आजकाल गैर थारु हुकन्हक संस्कारह मन्टी ओ लाल टिका लगाए लागल बाट । थारु समुदाय अहिंसात्मक समुदाय हो उहो मारसे थारुहुक्र मन्ना हरेक टैटिह्वारम पहिल उज्जर टिका लगाइठ । तर आजकाल उज्जर टिका लगाए छोर्क लाल टिका लगाए लागल बाट ईफे थारु समुदायक निम्ति चुनौतीक विषय हो । आधुनिकता कहटकहट पाछ जाक हमार आपन इतिहास ओ पहिचान हेराक निजाई कह निसेक्जाइट । थारु समुदायक हरेक चिजम ढिउर चुनौती बा कि थारु समुदायक भेषभूषा समेत हेरा स्याकल अवस्था बा । कबुकाल महोत्सव तथा कार्यक्रम ओ सभासमारोहम थारुन्हक पहिचान झल्कना भेषभुषा लगाइल पाजिठा तर जन्नी मनैकेल । का थारु समुदायक पहिचान बचैना जन्नी मनै केल हुइट ? पक्क फे निहो पहिचान बचैना ट थारु ओ जन्नी सक्कुजन हुइट । उहो मार थारु समुुदायक लगाम बचैना फे बहुट चुनौती डेख्परठ । थारुन्हक पहिचान कलक भेषभुषा, खानपान, बोलचाल, टैटिह्वार हो तर ईहिम फे आधुनिकता भिट्टर स्याकल बा ईफे थारु समुदायक मौलिक पहिचान बचाइग लाग चुनौतीक विषय बनल बा ।


ओस्टक डश्यक गैना सख्या गीत ओ नाच फे हेराइलागल बा । पहिल प्रत्यक गाउँम नच्ना सख्या नाच आजकाल अंग्रीम गन्ना गाउँम केल नच्लक पाजिठा । अष्टिम्कीसे गाजिना सख्या गीत ओ नाच लोभ हुइ लागल अवस्था बा । कहोरे ट नाच समेत छोरसेक्ल बाट । कारण आपन संस्कृति ओ अप्नह बिर्साइ लग्लक डेख्परठ । और समुदायम निनाच्जिना सख्या नाचह बचैनाफे थारु समुदायम चुनौतीक विषय बनल बा काजे कि पहिल सख्या नाच गीत कलसे सक्कुजहन थाहा ह्वाए तर आजकाल त सख्या नाच ओ गीत कलसे आजकालिक लर्कापर्का हुक्र काहो सख्या नाच ओ गीत कना अवस्था आस्याकल बा । सबसे भारी चुनौती त बोलचाल डेख्परठ । पह्राई तथा कामकाजक शिलशिलाम घरसे बाहार जैना ओ आपन भाषाह विर्सैना ओ गैर थारु भाषा बोल्ना कारणले थारु भाषा ओझेलम परटा । ओसहक थारु भाषा (आपन भाषा) बोल्लसे मै कमजोर हुइठु कि अथवा महिन निमजा सोँस्ठ कि कना गलत सोचाईले थारु भाषाम विकृति आइ लागल कना थारु भाषा तथा संस्कृतिविद् हुकन्हक कहाई पाजिठा । विशेष कैख भाषा, भेषभुषा, संस्कृति हेरैटी जाइटा सबसे भारी चुनौती इहे डेख्परठ । थारु संस्कृति ओ आपन पहिचानप्रति वितृष्णाक कारण थारु समुदायम पहिचानक संरक्षणम बहुट समस्या सिर्जना हुइल बा ।

समाधानक उपाय


थारु समुदायक समस्या समाधान करक लाग एक दुई जन कैक केल निहुइट । बहुट समस्या बा काजे कि पुरान पुस्ताक मनै पहिचान बचैना कैक लग्लसेफे आजकालिक मनै आपन संस्कृति बचाई कनाहोर ढेर ध्यान डिहेल निडेख्परठ । थारु समुदायक इतिहास बचाइग लाग भाषिक, सांस्कृतिक, सामाजिक, पक्ष लगायतक हरेक पक्षम मौलिकताह स्थान डिहे आवश्यक बा ।
थारु के हुइट ओ समुदायक पहिचान कलक काहो कना प्रश्न उठैना ठाउँ थारु समुदाय कहोँरेसे निआए कना सोचाई आम सक्कु थारुन्हक मनक ह्वाए जरुरी बा । थारु समुदायक जनसंख्या अनुसार राज्यक नेतृत्व ओ सहभागिताक सवालम थारु समुदायक पहिलसे ढेर आघ बहर्लसेफे निर्णायक तहम पुग निस्याकल अवस्था बा ओ आव राज्यक हरेक तहम थारु समुदायक प्रतिनिधित्व ह्वाए आवश्क बा । पाछ पर्लक कैक चिन्जैना थारु समुदायक मनै आब हम्रफे हौने चिजम कमजोर निहुइटी ओ हामारठे हकरे चिजक क्षमता बा कैक आघ बह्रपर्ना डेख्परठ ।
तुल्सीपुर दाङ

थप सम्बन्धित समाचार
Follow
Us