कृषकहे आधुनिक कृषि प्रणाली अपनैनामे प्रदेश सभा सदस्य बीरमान चौधरीके जोड

-kailarionline

शुक्रवार, २१ मंसिर 7:10 PM

हसुलिया, २१ अगहन । सुदूरपश्चिमके प्रदेशके प्रदेशसभा सदस्य बीरमान चौधरी कृषकहुक्रनहे आधुनिक कृषि प्रणाली अपनैनामे जोड डेले बाटै ।
शुकके रोज हसुलियामे वनदेवी कृषि सहकारी संस्थाके पाँचौं वार्षिक साधारण सभा तथा दुसरा अधिवेशनके कार्यक्रमहे सम्बोधन करटी परम्परागत कृषि प्रणालीहे आधुनीकरण, यान्त्रिकीकरण करे पर्नामे जोड डेहल हुइट । परम्परागत कृषि खेतीसे ढिउर उत्पादन नाइ हुइना कहटी उहाँ आधुनिक कृषि प्रणालीहे अपनाइ पर्नामे जोड डेहल हुइट ।

 

 

कार्यक्रमके बर्का पहुना समेत रहल प्रदेश सभा सदस्य चौधरी सहकारी मार्फत कृषकहुक्रनहे मलखाद, कृषि यन्त्रउपकरण लगायत कृषकहुक्रनहे ऋण सहयोग करे पर्ना जोड डेहल रहिट । ओस्टके धान, गेँहु, मसुर किल नाइहोके गन्ना, मच्ची, तरकारी, फलफूलके खेती ओर फेन अग्रसर हुइपर्ना बटाइल रहिट । साथे उहाँ माछा पालन, पशुपालन, तरकारी खेती लगायतमे अनुदानके कार्यक्रम रहल ओरसे कृषकहुक्रे यहोर फेन लागे पर्ना जोड डेहल रहिट । खास पहुना नेपाल वीउ व्यवसाय संघके अध्यक्ष लक्ष्मीकान्त ढकाल देशके युवा जनशक्ति विदेश पलायन हुइटी रहल ओरसे सहकारीसे तमान मेरिक सीपमुलक तालिम, कृषि अनुदानके कार्यक्रम लाने पर्ना जोड डेटी प्रदेश सदस्य चौधरीहे पहलके लाग आग्रह करल रहिट ।

 

 

सहकारीके संस्थापक संरक्षक सुरेशचन्द्र चौधरी समाजहे रुपान्तरणके लाग सहकारी तमान मेरिक कृषि कार्यक्रम लागु करल बटैलै । उहाँ विज वृद्धि, कृषि तालिम लगायत सहुलियत दरमे मलखाद लगायत ऋण सहयोग करल बटैलै ।
कार्यक्रममे राप्रपा जिल्ला कार्यसमिति अध्यक्ष होमबहादुर गुरुङ किसानहुक्रनके सम्बन्धित निकायमे पहुँच नाइहोके कृषिके लाग मलखाद, तेलपानी नाइ पैना समस्या रहल बटैलै । देशमे आधुनिक कृषि प्रणाली लागु कैना मने समयमे मलखाद, विउ विजन, तेलपानी नाइ पैलेसे उत्पादनमे कैसिक वृद्धि आइ कना प्रश्न करटी समयमे मलखाद, विउ विजन उपलब्ध कैना जोड डेहल रहिट ।
कार्यक्रममे वसन्ता कृषि सहकारीके अध्यक्ष राजसमझ चौधरी, पादर्शी महिला विकास वहुउद्देश्यीय सहकारीके अध्यक्ष गीता चौधरी, ज्योति विकास बैंकके शाखा प्रवन्धक नविन रावल लगायत धारणा राखल रहिट ।
उहे कार्यक्रममे सहकारीके व्यवस्थापक होरीलाल चौधरी आव २०७४/०७५ के आर्थिक प्रतिवेदन प्रस्तुत करल रहिट । सहकारीसे कुल एक करोड, ३७ लाख, ७५ हजार ३३१ रुप्या बराबर आर्थिक करोबार करले बा । ओस्टके सहकारीसे ४० लाख ४२ हजार १७० रुप्या बराबर ऋण लगानी करले बा कलेसे आठ लाख सात हजार ४७१ रुप्या बराबर ऋण असुली करले बा ।
सहकारीके अध्यक्ष ईच्छा चौधरीके अध्यक्षतामे हुइल कार्यक्रमके स्वागत मनतब्य उपाध्यक्ष तीर्थ प्रसाद नेपाल करले रहिट । कलेसे सञ्चालन सहसचिव सुनिता चौधरी करले रही ।

 

पहुराकर्मी नरेन्द्र चौधरी सहित तमान व्यक्तित्व सम्मानित
पहुरा थारु दैनिकके हसुलिया व्युरो चिफ तथा पत्रकार नरेन्द्र चौधरी सम्मानित हुइल बाटै ।
हसुलिया स्थित वनदेवी सहकारी आपन पाचौं वार्षिक साधारण सभा तथा दुसरा अधिवेशनके अवसरमे पत्रकार चौधरीहे सम्मान करल हो । सहकारीके सेयर सदस्य समेत रहल चौधरीहे सहकारीसे मिडिया मार्फत उल्लेखनीय योगदान पुगाइल कहटी सम्मानित करल हो । उहाँहे सुदूरपश्चिम प्रदेशके प्रदेश सदस्य तथा कार्यक्रमके बर्का पहुना बीरमान चौधरी प्रमाण पत्र तथा दोसल्ला ओह्राके सम्मान करल रहिट ।

 

 

ओस्टके सहकारीसे उहे अवसरमे तमान तमान समूह तथा व्यक्तित्वहुक्रनहे समेत सम्मान करले बा । सहकारीसे मनकामना असल समूह, प्रदर्शन समूह, चमेली समूह प्रशंसापत्र ओ दोसल्ला ओढाके सम्मान करगिल रहे । असल कृषकमे चन्द्रबहादुर चौधरी, खोजराम चौधरी, रुपलाल चौधरीहे सम्मान करगिल रहे । ओस्टके सफल एग्रोभेट ओर कालीचरण एग्रोभेट, सफलता एग्रोभेटहे सम्मान करल बा । ओस्टके असल ऋणीओर मेघा फेन्सी स्टोर हसुलिया, सरमति कामी, अमृता देवी कामीहे फेन सम्मान करगिल बा ।
असल बचतकर्ता ओर बसन्ती देवी चौधरी, आरती चौधरी, रामपति चौधरी, रामकृष्ण चौधरी, चन्द्रकला नेपालहे समेत सम्मान करगिल बा । ओस्टके असल कर्मचारीओर व्यवस्थापक होरीलाल चौधरी, दुखीराम चौधरी, रामनरेश चौधरी, फुलकुमार चौधरी ओ कान्छी चौधरी फेन सम्मान करगिल बा ।
ओस्टके सहकारीके लेखा परीक्षक डा. जानकी तुलाधर ओ सहकारी कानुनी सल्लाहकार गजेन्द्र बहादुर केसी, ऋण संयोजक रामकृष्णी चौधरी, लेखा संयोजक श्रवणकुमार चौधरीहे समेत सम्मान करले बा ।
कलेसे सहकारीसे कार्यसमितिके पदाधिकारीहे समेत प्रसंशा पत्रसे सम्मान करगिल बा ।

 

वनदेवी सहकारीके अध्यक्षमे फेरसे ईच्छा चौधरी
वनदेवी कृषि सहकारी संस्था हसुलियाके अध्यक्षमे फेरसे ईच्छा चौधरी अध्यक्षमे निर्विरोध चयन हुइल बाटी ।
शुकके रोज सहकारीके पाँचौं वार्षिक साधारण सभा तथा दुसरा अधिवेशनसे चौधरी फेरसे अध्यक्षमे चयन हुइल हुइटी । ओस्टके लौव कार्यसमितिके उपाध्यक्षमे फेरसे तिर्थ प्रसाद नेपाल चयन हुइल बाटै । उहाँ फेन निर्वोरोध उपाध्यक्षमे चयन हुइल हुइट ।

 

 

ओस्टके कार्यसमितिके सचिवमे विन्तीराम चौधरी ओ कोषाध्यक्षमे सुनिता चौधरी चयन हुइल बाटी । कलेसे समितिके सदस्यमे क्रमशः रामकृष्णी चौधरी, आशा चौधरी, बेचनलाल चौधरी, राजकुमारी चौधरी, महासिंह कामी रहल बाटै । कलेसे लेखा संयोजकमे श्रणण कुमार चौधरीहे रहल बाटै ।

थप सम्बन्धित समाचार
Follow
Us